Тропарь, глас 4
Словесем Павловым наушившимся, богоневестная Фекло/ и верою утвердившися от Петра , богозванная,/ первомученница явилася еси и первострадальница в женах,/ возшла еси на пламень , яко на место благоцветущее,/ звери и юнцы устрашишася тебе, вооружися бо Крестом./ Тем моли всехвальная, Христа Бога,// спастися душам нашим.
Кондак, глас 8
Девства добротою просияла еси,/ и мученичества венцем украсилася еси,/ апостольству вверяешися, яко преславная;/ и огня убо пламень в росу преложила еси,/ юнца же ярость молитвою твоею укротила еси,// яко первострадальная.
Ин кондак, глас 2
Уязвивши твое сердце. добродево. любовию Христовою,/ обручника временнаго, яко небрегома, преобидила еси,/ и на огнь дерзнула еси;/ зверей же уста заградила еси,/ и, спасшися от них, прилежаще, Павла ищущи,//Фекло первострадальная.
Величание
Величаем тя,/ страстотерпице Христова равноапостольная Фекло,/ и чтим болезни и труды твоя,/ имиже трудилася еси// во благовестии Христове.
Молитва
О, многострадальная и премудрая первомученице Фекло! Ты душею на небеси у Престола Господня предстоиши, на земли же, данною тебе благодатию, различная совершаеши исцеления; призри убо милостивно на предстоящия люди и молящияся пред пречистым образом твоим, просящия твоея помощи; простри ко Господу святыя молитвы твоя о нас и испроси нам оставление согрешений наших, недужным исцеление, скорбящим и бедствующим скорую помощь; умоли Господа, да подаст всем нам христианскую кончину и добрый ответ на страшнем судищи Своем, да сподобимся и мы купно с тобою славити Отца и Сына и Святаго Духа, во веки веков. Аминь.
|